Добредојдовте
на страницата на ЦЕИПА
На оваа страница можете да најдете повеќе информации за нас, новости и други активности.
Повеќе за нас...Здружението ЦЕИПА е формирано во 2016 г. Во него активно се вклучени доктори и магистри на етнолошки и антрополошки науки и други сродни хуманистички и општествени дисциплини, студенти на студиите по етнологија и антропологија и други посветеници на промовирањето и заштитата на културните вредности. Исто така, во проектните активности партнерски и рамноправно се вклучени стручни лица, вработени во институциите кадешто партнерски се реализираат проектите како ментори и реализатори на проектните активности.
18/04/2023
Центарот за етнолошки истражувања и применета антропологија (ЦЕИПА) во соработка со Институтот за етнологија и антропологија, Природно-математички факултет, Универзитет Св. Кирил и Методиј објавува повик за трудови за меѓународна конференција:
„Солидарност и поддршка во ерата по социјалната држава“
Во светло на 60-годишнината од катастрофалниот земјотрес во Скопје
14-15 септември, 2023 година
Поимот солидарност повикува замисла за општество втемелено во вредностите на взаемна посветеност и емпатија кон другите. Како социјална практика, солидарноста се манифестира во кризни ситуации - пандемии, земјотреси, воени конфликти, миграции и раселувања поради климатски и еколошки промени. Солидарност е исто така концепт кој се однесува на фундаменталните општествени односи во секојдневниот живот, засновани врз взаемност, споделување и реципроцитет. Секогаш кога зборуваме за солидарноста се занимаваме истовремено со описното и со нормативното значење. Во јули 2023 година ја одбележуваме 60-годишнината од катастрофалниот земјотрес во Скопје, настан кој поттикна глобално движење и го започна процесот на именување на Скопје во „град на солидарноста“. Додека размислуваме за последиците од земјотресот и последователните децении на физичка и симболична реконструкција, би сакале да ги поканиме авторите критички да ги испитаат поимањата за солидарност преку изрази на заеднички вредности и взаемна поддршка, како и формите на несолидарност или маргините на солидарност во контекст на ерата по социјалната држава.
Концептот на солидарност има долга традиција во општествените науки уште од пионерското дело на Диркем (1897) кое ја нагласува идејата за нејзината важност за социјалната кохезија. Со текот на времето концептот беше прилично запоставен, додека конечно не се појави повторно во контекст на глобализација на локалните и регионалните кризи. Солидарноста веќе не е само теориски концепт, таа е исто така централна за активистите и политичките актери. Сите се занимаваат со (или го инструментализираат) прашањето за взаемна поддршка и како да се постигне заедништво со цел подобрување на егзистенцијата и заедничката благосостојба. Солидарноста функционира во рамките на взаемноста каде практиките на споделување и взаемна поддршка се спротивставени на вредностите на пазарниот свет (Гудеман 2009). Изградбата и манифестирањето на солидарноста на различни начини се менуваше во 6-те децении од скопскиот земјотрес. Промената на геополитичките граници, социо-економската ситуација и движењето на населението ги променија локалните практики и системи на вредности. Поимот благосостојба, силно поврзан со економијата и политиката во форма на социјална сигурност, исто така е тема на интерес во антропологијата, во смисла на создавање на благосостојба (Appadurai, 2004), поврзана со критичко разгледување на грижа (Read and Thelen, 2007), и преку форми на „скриена социјална грижа“ во однос на социјалната економија (Ракополус, 2015). Од државите во кои некогаш била опфатена социјалната сигурност, преку неолибералните трансформации, ги покануваме учесниците да се вклучат во дискусии за солидарноста, или нејзиниот недостаток, како и размислувањата за хегемонистичките наративи за социјалната држава во рамки на променливата политичка динамика на ниво на локални заедници или на пошироко макро ниво.
Покануваме трудови кои се занимаваат со поимот солидарност, благосостојба и социјална сигурност од различни дисциплини во неколку подтеми:
- Солидарност и социјална сигурност во теорија и практика
- Солидарност во историска перспектива
- Солидарност и економии
- Солидарност и ранливост
- Простори на солидарност
- Облици на социјална сигурност - Политичкиот концепт или општествен принцип на социјалната сигурност, епоха на социјална сигурност или можна иднина.
Ве покануваме да испратите предлози за презентации во времетраење од 15 минути. Крајниот рок за испраќање на апстракти (300 зборови) е 31 мај, 2023 година. Сите апликанти ќе бидат известени за статусот на нивната пријава до 20.06.2023. Апстрактите треба да се испратат на ceipa.mkd@gmail.com во Word документ. Документот треба да содржи: наслов на презентација, апстракт (300 зборови), целосно име и презиме на апликантот, институција и контакт информации. Конференцијата ќе се одржи во Скопје, во период 14-15 септември, 2023 година.
За дополнителни информации, можете да исконтактирате со Еда Старова Тахир eda@pmf.ukim.mk.
